Shoqata Bashkimi i Intelektualëve Shqiptarë në Zvicër (BISHZ) është bashkim i lirë dhe i pavarur i intelektualëve shqiptarë në Zvicër.

Shoqata nuk ushtron veprimtari fitimprurëse dhe vepron në përputhje me nenin 60 të Kodit Civil Zviceran.

Qëllimi i Shoqatës:

- Bashkimi i potencialit intelektual shqiptar në Zvicër dhe atë ta vëjë në shërbim të çështjes kombëtare në përgjithësi dhe të bashkësisë shqiptare në Zvicër;

- Organizimi dhe zhvillimi i veprimtarive kulturore, projekteve profesionale e shkencore dhe tribunave të ndryshme;

- Bashkëpunimi me përfaqësuesit e ligjshëm të Republikës së Kosovës, të Republikës së Shqipërisë, të shqiptarëve në trevat etnike, me përfaqësuesit e

   Qeverisë Zvicerane si dhe me subjektet e organizuara shqiptare në Zvicër, entet dhe shoqatat profesionale simotra.

Shoqata tubon rreth 130 intelektualë shqiptarë të profesioneve të ndryshme që punojnë dhe jetojnë në Zvicër.

Shoqatën e udhëheqë Kryesia në të cilën punojnë kryetari, nënkryetari, sekretari, arkëtari, tetë  këshilltarë dhe dy administratorë.

Shoqata është e regjistruar në regjistrin e Firmave/Shoqatave në Bernë, Zvicër.

Numri i regjistrit të shoqatës  është CH-035.6.017.908-1

Anëtarësimi:

Anëtar i BISHZ-së mund të jetë çdo intelektual-e që pranon statutin, paguan kuotizacionin e anëtarësisë dhe kontribuon në mbarëvajtjen e punës së Shoqatës. 

Anëtari i BISHZ-së mund të ketë statusin:

- anëtar individual

- anëtar nderi

Anëtarë nderi mund të shpallen personat që kanë merita të posaçme për mbarëvajtjen e punës, apo ata që me anëtarësimin e tyre i bëjnë nder Shoqatës.